Прес-конференција на Кети Стевананџија, членка на ЦО на СДСМ
Заради катастрофалните економски политики на најнеспособната Влада во историјата на државата, Македонија забрзано чекори кон финансиски колапс и сиромаштија.
Тоа го навестуваат многу релевантни показатели:
- Странските компании кои вработуваат десетици илјади македонски граѓани го намалуваат бројот на вработени; голем дел од нив се спремаат да ги затворат фабриките во Македонија и бизнисот да го преместат во други држави;
- Покрај унгарскиот кредит од 500 милиони евра, Владата предизборно и неконтролирано се задолжува со кредити со високи каматни стапки;
- Минималната плата, како и платите на вработените и во државниот и во приватниот сектор, стагнираат;
- Цените на прехранбените и другите производи секојдневно одат нагоре, а таканаречените „кошнички“ на Мицкоски се обична фарса и замајување на јавноста;
Во ситуација кога секое второ семејство во Македонија се соочува со сиромаштија, не само што актуелната власт не прави ништо да им помогне, туку дополнително ги осиромашува и ги турка во безнадежност.
Да потсетиме: владејачката коалиција на ДПМНЕ, ЗНАМ и ВЛЕН ја укина субвенционираната струја со која сметките за електрична енергија за време на Владата на СДСМ беа пониски за 30 отсто.
Истовремено, Владата на Мицкоски го одби предлогот на СДСМ за намалување на ДДВ-то за електрична енергија од 18 на 5 отсто и укинување на ДДВ за основните прехранбени производи.
Ако владејачкото мнозинство ги прифатеше предложените законски измени, тоа ќе значеше намалување на цената на струјата и поевтинување на над 3.000 производи, меѓу кои и лебот, млекото, маслото, јајцата, шеќерот, брашното.
Освен неспособната Влада, за прилепчани дополнителна несреќа е 40-месечното неодговорно владеење на ДПМНЕ и Борче Јовчески, период во кој поскапеа водата, данокот на имот, комуналните услуги, паркингот и градскиот превоз.
Едно е сигурно – личниот интерес е единствениот вистински приоритет на актуелните владини партнери. Социјалната правда, економската стабилност и стандардот на граѓаните, ќе почекаат на некои подобри времиња.
